Taking too long? Close loading screen.

Ā’ai Nō Mo’o Re’a Tei Hōro’a I Tōna I’oa

Ā’ai Nō Mo’o Re’a Tei Hōro’a I Tōna I’oa Nō Te Fenua Moorea

Tē fa’ati’a nei teie ‘ā’ai nō te fenua nō Maiao e mea nāhea te i’oa ‘o Mo’o re’a i topahia.

‘Ua fānau ‘o Temaiatea vahine i te hō’ē huero.

I te mātāmua, tē fa’aea nei ‘o Temaiatea ‘e tāna vahine i ni’a i te fenua nō Tupuai- Manu tei pi’ihia ‘o Maiao. ‘Ua hapū ‘o Temaiatea vahine ‘e ‘ua fānau i te hō’ē huero. Rave mai nei ‘o Temaiatea i te huero nō te ‘āfa’i atu i roto i te hō’ē ana iti piri i tahatai o tei pi’ihia Vaionini.

I te hō’ē pō, ‘ua ‘ōramahia ‘o Temaiatea vahine. ‘Ua ‘ite ‘oia ē, ‘ua fānau ‘ōna i te hō’ē tamāroa ‘iri re’are’a. Ara mai nei ‘o Temaiatea vahine nō te fa’ati’a atu i tāna tāne. I te po’ipo’i a’e haere atu ra te tāne e hi’o i te huero tāna i vaiho i roto i te ana. ‘Ite atu ra ‘ōna ē, ‘ua parari te huero, e mo’o re’a mai tā tāna vahine i ‘ite i roto i tāna moemoeā.

Nō te ri’ari’a ‘ua fa’aru’e te metua i tā rāua tamaiti ‘o Mo’o re’a.

Pi’i atu ra ‘o Temaiatea i tāua mo’o ra ‘o Mo’o re’a. I roto i te ana, ‘ua fa’a’amu rāua tāna vahine ia Mo’o re’a tae roa atu i tōna pa’arira’a. I tōna rahira’a mai, ri’ari’a iho ra te metua vahine ma te parau atu i tāne ē :

« E fa’aru’e tāua ia Mo’o re’a, ‘ia ‘ore fātata roa ‘ōna e ‘amu ia tāua. »

‘Aita te tāne i fāri’i ma te pāhono atu ē :

« ‘E tamari’i ho’i teie o tā tāua i pi’i atu ‘o Mo’o re’a »

Nō te onoonora’a a te vahine, fāri’i atu ra te tāne i tōna hina’aro. Tarai atu ra ‘o Temaiatea i te tahi vā’a nō rāua, nō te horo atu i te hō’ē fenua ‘ē. I te taime a oti mai ai teie vā’a, pa’uma atu ra rāua ma te haere atu i te pae hiti’a o te rā. ‘Ua tāpae rāua i Tahiti, ma te tomo atu i roto i te ava nō Taapuna. Mai reira mai, ‘ite atu ra rāua i te tahi vāhi pūhapara’a i ni’a i te tara mou’a.

Tē ‘imi nei ‘o Mo’o re’a i tōna nā metua.

Tē mihi noa nei ‘o Mo’o re’a i tōna nā metua fānau tei fa’a’amu iāna. Nō te mea ‘aita tōna nā metua e ‘āfa’i fa’ahou mai i te mā’a, mana’o iho ra ‘ōna ē ‘ua fa’aru’e rāua iāna.

Haere atu ra ‘ōna i ni’a i te a’au o tei pi’ihia ‘o Ava-ava mou’a ‘oia ho’i tē terera’a atu te mou’a nā ni’a i te a’au. Nō te mea, ‘ua mana’o te ta’ata ē e mou’a terā e tere ra i ni’a i te a’au. ‘E’ere roa atu, ‘o Mo’o re’a ho’i teie e ne’e ra nā ni’a i te a’au. Tāpapa atu ra o’ Mo’o re’a i tōna nā metua i te pae hiti’a o te rā.

I te taime ‘o Mo’o re’a a ātea roa ai i te fenua, ‘ua ‘aro ‘ōna i te ‘ōpape nō Teara- Veri, ‘e ‘ua matara mai nei. ‘Aita e hu’a miti tō teie ‘ōpape teie rā, ‘ua haere roa tōna terera’a mai te veritara te huru.

‘Aro atu ra ‘o Mo’o re’a i te piti o te ‘ōpape o tei pi’ihia Tefara. Nō te mea, e ‘ōpape taratara mai te tumu fara ra te huru. ‘Ua matara fa’ahou mai ‘o Mo’o re’a, teie rā, ‘ua rohirohi roa ‘ōna.

‘Aro mai nei i te toru o te ‘ōpape tei pi’ihia Tepu’a, nō te mea e ‘ōpape pūai roa. ‘Ua riro te hu’a miti ‘ei hu’a pu’a.

Mai reira mai ‘o ‘Aimeho (i’oa mātāmua ‘o Moorea) i te pi’ira’ahia ‘o Mo’o re »a.

Sources : ‘Ā’ai nō mo’o re’a tei hōro’a i tōna i’oa nō te fenua Moorea du site TAHITI HERITAGE
Sources TAHITI HERITAGE : Ara’i Temauri, juin 1961. A’Ai no te Mo’o, la légende du lézard. Bulletin de la Société des Études Océaniennes. n°138 Mars 1962, p 30
Hurihia nā roto i te reo tahiti e Larissa Faana

Moorea surnommée l’île sœur est l’un des endroits les plus mémorables de Polynésie, de par sa beauté, son authenticité, ainsi que la convivialité et la gentillesse de sa population.

Page Facebook de la Commune

Nous situer

Commune de Moorea - Maiao © 2024. Tous les droits sont réservés.